Íslenskur texti, þýðingar og póstsniðmát

Þessi síða hjálpar þér þegar texti í Odoo, í tölvupóstum eða á skjölum birtist á ensku eða á lélegri íslensku, og þegar þú vilt breyta texta í póstsniðmátum á íslensku og ensku. Fyrir hvert tilvik sérðu hvað þú getur athugað og lagað og hvenær og hvernig þú hefur samband við Exigo.

Texti í Odoo er á ensku eða á lélegri íslensku

Hnappar, reitir, valmyndir, skilaboð eða fyrirsagnir á skjölum birtast á ensku, eða íslenska orðalagið er rangt eða óskýrt. Þetta getur líka átt við heilt forrit eða texta á kvittunum í kassakerfinu.

Hvað gæti valdið þessu

• Textinn er fastur hluti af Odoo og íslensku þýðinguna vantar eða hún er léleg. Fastir textar eru til dæmis heiti reita og hnappa, skilaboð og fyrirsagnir á tilboðum og reikningum. Þeim er ekki hægt að breyta í venjulegum skjám Odoo.
• Textinn er hluti af gögnunum þínum, til dæmis heiti forrits eða valmyndar, vöruheiti eða texti í póstsniðmáti. Slíkum texta geta notendur með réttindi breytt.

Hvað þú getur athugað

1. Taktu skjámynd sem sýnir textann og skrifaðu hjá þér hvar hann birtist, með valmyndarleið.
2. Ef textinn er heiti forrits eða valmyndar getur stjórnandi breytt því. Virkjaðu forritaraham, farðu í Stillingar ‣ Tæknilegt ‣ Notendaviðmót ‣ Valmyndaeiningar, opnaðu valmyndina, breyttu heitinu og vistaðu. Heitinu á öðrum tungumálum breytirðu með tungumálahnappnum í reitnum, eins og lýst er í kaflanum Vöruheiti eða skilmálar birtast á ensku á skjölum.
3. Ef textinn er vöruheiti, texti í tölvupósti eða texti á vefnum, lestu viðeigandi kafla hér að neðan.
4. Ef textinn er fastur hluti af Odoo, sendu hann Exigo eins og lýst er hér á eftir.

Hvenær á að hafa samband við Exigo

Hafðu samband þegar fastur texti er á ensku eða illa þýddur, eða þegar heilt forrit vantar íslenska þýðingu. Ef textarnir eru margir, sendu þá alla í einum lista. Sendu póst á hjalp@exigo.is með eftirfarandi:

• skjámynd af textanum,
• hvar textinn birtist, til dæmis valmyndarleið, heiti skjals eða kvittun í kassakerfinu,
• textanum eins og hann er núna,
• textanum eins og hann á að vera.

Odoo birtist á ensku eða nýjar þýðingar sjást ekki

Valmyndir og skjáir birtast á ensku þótt þú hafir valið íslensku, eða þú sérð enn gamla textann eftir að þýðingu var breytt.

Hvað gæti valdið þessu

• Tungumálið í stillingum notandans þíns er enska, eða breyting á því hefur ekki enn tekið gildi í vafranum.
• Vafrinn geymir þýðingarnar. Odoo sýnir fyrst þýðingarnar sem vafrinn geymir og sækir þær nýju á meðan. Nýr texti birtist því ekki fyrr en síðan er hlaðin næst.

Hvað þú getur athugað

1. Smelltu á notandamyndina þína efst til hægri og veldu My Preferences. Athugaðu hvort íslenska sé valin í reitnum Tungumál á flipanum Stillingar. Ef þú breytir reitnum, smelltu á Update Preferences.
2. Endurhladdu síðuna tvisvar með F5. Fyrri hleðslan sækir nýju þýðingarnar og sú seinni sýnir þær.
3. Ef gamli textinn birtist enn, breyttu reitnum Tungumál í ensku, smelltu á Update Preferences og breyttu honum svo aftur í íslensku.
4. Opnaðu Odoo í huliðsglugga (private window). Ef Odoo birtist þar á íslensku er vandinn í gögnum sem vafrinn geymir. Hreinsaðu þá skyndiminni vafrans eða prófaðu annan vafra.
5. Til að breyta tungumáli annars notanda: farðu í Stillingar ‣ Notendur og fyrirtæki ‣ Notendur, opnaðu notandann og veldu tungumál í reitnum Tungumál á flipanum Stillingar. Til þess þarf stjórnandaréttindi.

Hvenær á að hafa samband við Exigo

Hafðu samband ef Odoo birtist á ensku hjá öllum notendum, eða ef nýr texti birtist ekki eftir þessi skref. Sendu póst á hjalp@exigo.is með eftirfarandi:

• skjámynd af skjánum sem birtist á ensku,
• hvaða notandi og hvaða vafri á í hlut,
• hvaða skref hér að ofan þú prófaðir.

Tölvupóstur eða skjal fer á ensku

Viðskiptavinur eða birgir fær tölvupóst, tilboð, reikning eða pöntun á ensku þótt hann eigi að fá það á íslensku. Eða öfugt: erlendur viðskiptavinur fær íslenskan texta.

Hvað gæti valdið þessu

• Tungumál tengiliðarins er rangt. Odoo sendir tölvupósta og prentar skjöl á tungumáli tengiliðarins sem er valinn á skjalinu.
• Skjalið er stílað á tengilið hjá fyrirtækinu, til dæmis starfsmann birgis, og sá tengiliður hefur annað tungumál en fyrirtækið. Þegar tungumáli fyrirtækis er breytt breytist tungumál tengiliða sem þegar eru skráðir hjá því ekki.
• Íslensku útgáfuna vantar í póstsniðmátið eða í texta skjalsins. Þá fær viðskiptavinurinn enska textann þótt tungumál hans sé rétt.

Hvað þú getur athugað

1. Opnaðu tengiliðinn í appinu Tengiliðir og athugaðu reitinn Tungumál. Reiturinn sést aðeins þegar fleiri en eitt tungumál eru virk í kerfinu.
2. Athugaðu á hvern skjalið er stílað. Ef þar stendur heiti fyrirtækis, komma og nafn tengiliðar er skjalið stílað á tengiliðinn. Opnaðu hann og athugaðu tungumál hans líka.
3. Leiðréttu tungumálið og sendu eða prentaðu skjalið aftur. Tölvupósturinn og útprentunin fylgja tungumáli tengiliðarins eins og það er þegar þú sendir eða prentar.
4. Lýsingar í línum á tilboði eða reikningi eru sóttar á tungumáli viðskiptavinarins þegar varan er sett í línuna. Línur sem voru komnar inn áður en þú breyttir tungumálinu breytast ekki. Lagaðu textann í línunni eða eyddu línunni og settu vöruna inn aftur.
5. Reikningur sem þegar hefur verið sendur fer aftur með sama PDF-skjali þegar þú sendir hann á ný.
6. Ef tungumál tengiliðarins er rétt en tölvupósturinn kemur samt á ensku, opnaðu póstsniðmátið eins og lýst er í næsta kafla og athugaðu reitinn Tungumál á flipanum Stillingar. Sá flipi sést aðeins í forritaraham. Ef reiturinn er tómur notar Odoo tungumál tengiliðarins.

Hvenær á að hafa samband við Exigo

Hafðu samband ef tungumál tengiliðarins er rétt en tölvupósturinn eða skjalið kemur samt á ensku, eða ef senda þarf aftur reikning á öðru tungumáli en fyrsta sendingin. Sendu póst á hjalp@exigo.is með eftirfarandi:

• númeri skjalsins,
• tengiliðnum sem það var sent á,
• skjámynd eða PDF-skjalinu sjálfu,
• hvaða texti er á röngu tungumáli.

Texti í tölvupóstum frá Odoo er rangur eða illa þýddur

Þú vilt breyta orðalagi í tölvupósti sem Odoo sendir, til dæmis með reikningi eða pöntunarstaðfestingu, eða þýða sniðmát sem er aðeins til á ensku.

Hvað gæti valdið þessu

• Tölvupóstar eru búnir til úr póstsniðmátum. Hvert sniðmát á sér eina útgáfu fyrir hvert tungumál. Þegar þú breytir texta í sniðmáti breytist aðeins útgáfan á þínu tungumáli og aðrar útgáfur haldast óbreyttar.
• Sniðmátið hefur aldrei verið þýtt. Þá fá allir viðtakendur enska textann.

Hvað þú getur athugað

1. Virkjaðu forritaraham og farðu í Stillingar ‣ Tæknilegt ‣ Tölvupóstur ‣ Sniðmát tölvupósts. Opnaðu sniðmátið.
2. Breyttu reitnum Efni og textanum á flipanum Meginmál og vistaðu. Ef þú vinnur á íslensku breytist þá íslenska útgáfan.
3. Til að breyta ensku útgáfunni: veldu My Preferences, breyttu reitnum Tungumál í ensku og smelltu á Update Preferences. Opnaðu sniðmátið, breyttu textanum og vistaðu. Breyttu svo tungumálinu aftur í íslensku.
4. Efnislínunni geturðu líka breytt á öðru tungumáli með tungumálahnappnum í reitnum Efni. Á flipanum Meginmál sýnir tungumálahnappurinn textann sem HTML-kóða, og þar er einfaldara að skipta um tungumál eins og í skrefinu á undan.
5. Breyttu aðeins venjulegum texta. Ekki eyða eða skrifa yfir það sem Odoo fyllir sjálft út í hvert skipti, til dæmis nafn viðskiptavinar, númer skjals eða upphæð.
6. Smelltu á Sýnishorn til að skoða póstinn. Veldu dæmi um skráningu og tungumál í reitnum Force a Language, og skoðaðu bæði íslensku og ensku útgáfuna áður en sniðmátið er notað.
7. Texta í SMS-sniðmátum breytirðu í Stillingar ‣ Tæknilegt ‣ Phone / SMS ‣ SMS Templates. Þar breytirðu öðrum tungumálum beint með tungumálahnappnum í reitnum Meginmál.

[Skjámynd: póstsniðmát opið, með reitnum Efni, flipanum Meginmál og hnappnum Sýnishorn merktum]

Hvenær á að hafa samband við Exigo

Hafðu samband ef þú vilt nýtt sniðmát eða nýjan tengil eða hnapp í póstinn, til dæmis greiðslutengil, eða ef þú veist ekki hvaða sniðmát sendir póstinn. Sendu póst á hjalp@exigo.is með eftirfarandi:

• heiti sniðmátsins, eða skjalinu sem pósturinn var sendur úr,
• textanum eins og hann á að vera, á íslensku og á ensku,
• skjámynd af póstinum eins og hann er núna.

Póstsniðmát birtist rangt eða tómt

Eftir breytingu á sniðmáti berst tölvupósturinn tómur, með kóða eða undarlegum texta, eða aðeins önnur tungumálsútgáfan er röng.

Hvað gæti valdið þessu

• Breyting á sniðmátinu skemmdi kóðann sem fyllir póstinn út. Það getur átt við aðeins aðra tungumálsútgáfuna.

Hvað þú getur athugað

1. Opnaðu sniðmátið og smelltu á Sýnishorn. Skoðaðu póstinn á hvoru tungumáli með Force a Language til að sjá hvor útgáfan er röng.
2. Ef sniðmátið er staðlað sniðmát úr Odoo sést hnappurinn Endursetja sniðmát efst í sniðmátinu. Hann sækir upprunalega textann aftur á öllum tungumálum.
3. Settu breytingarnar þínar svo aftur inn, eina í einu, og skoðaðu Sýnishorn eftir hverja.

Hvenær á að hafa samband við Exigo

Hafðu samband ef hnappurinn Endursetja sniðmát sést ekki, ef pósturinn er enn rangur eftir að sniðmátið var endurstillt, eða ef þú vilt halda texta sem settur var í sniðmátið. Sendu póst á hjalp@exigo.is með eftirfarandi:

• heiti sniðmátsins,
• skjámynd úr Sýnishorn sem sýnir villuna,
• hvort tungumálið er rangt, eða bæði,
• hvenær sniðmátinu var síðast breytt.

Vöruheiti eða skilmálar birtast á ensku á skjölum

Vöruheiti, vörulýsingar eða skilmálar birtast á ensku á tilboðum og reikningum til íslenskra viðskiptavina, eða á íslensku til erlendra viðskiptavina.

Hvað gæti valdið þessu

• Texti sem þú skráir, eins og vöruheiti, sölulýsing og skilmálar, er geymdur í einni útgáfu fyrir hvert tungumál. Ef textinn hefur ekki verið skráður á tungumáli viðskiptavinarins birtist enska útgáfan.
• Lýsing í línu á tilboði eða reikningi er sótt þegar varan er sett í línuna. Breyting á vörunni eftir það breytir ekki línum sem þegar eru til.
• Sjálfgefnir skilmálar eru settir á tilboð og reikninga á tungumáli viðskiptavinarins þegar hann er valinn á skjalið.

Hvað þú getur athugað

1. Opnaðu vöruna og smelltu á tungumálahnappinn í heiti vörunnar, undir Vara efst á forminu. Hnappurinn sýnir skammstöfun tungumálsins þíns, til dæmis IS. Í glugganum sem opnast sérðu textann á hverju virku tungumáli. Breyttu textanum og smelltu á Vista. Sama gildir um sölulýsingu og aðra reiti sem hafa tungumálahnapp.
2. Langan texta með sniði, eins og reitinn Sjálfgefnir skilmálar í Fjárhagur ‣ Stillingar ‣ Stillingar, í hlutanum Sölureikningar, er einfaldast að þýða þannig: breyttu tungumálinu þínu í My Preferences, breyttu textanum og vistaðu, og breyttu svo tungumálinu aftur.
3. Ef tungumálahnappurinn sést ekki í heiti vörunnar er aðeins eitt tungumál virkt í kerfinu. Stjórnandi getur séð virk tungumál í forritaraham undir Stillingar ‣ Þýðingar ‣ Tungumál og bætt við tungumáli eins og lýst er í leiðarvísinum Breyta tungumálum.
4. Á skjölum sem þegar eru til lagarðu textann beint í línunni. Nýjar línur fá nýja textann.

[Skjámynd: vara opin með tungumálahnappnum IS í heiti vörunnar og glugganum með textanum á íslensku og ensku]

Hvenær á að hafa samband við Exigo

Hafðu samband ef þýða þarf mörg vöruheiti eða aðra texta í einu. Sendu póst á hjalp@exigo.is með eftirfarandi:

• hvaða vörur eða textar eiga í hlut,
• textanum á hverju tungumáli, til dæmis í töflureikni.

Enskur texti í íslensku vefversluninni

Viðskiptavinir sjá enskan texta á vefnum eða í vefversluninni, til dæmis á vörusíðum eða í körfunni, þótt vefurinn sé á íslensku.

Hvað gæti valdið þessu

• Íslensku útgáfuna vantar fyrir textann, til dæmis vöruheiti, vörulýsingu eða texta á síðu.
• Textinn kemur úr Odoo sjálfu eða úr þema vefsins, til dæmis í körfunni og greiðsluferlinu.

Hvað þú getur athugað

1. Opnaðu síðuna í forritinu Vefsíða og smelltu á Breyta. Á sjálfgefnu tungumáli vefsins, til dæmis þegar vefurinn er aðeins á íslensku, breytirðu textanum beint og smellir á Vista.
2. Til að laga texta á öðru tungumáli vefsins: skiptu yfir í það tungumál með tungumálavali vefsins, smelltu á Breyta og veldu Þýða. Valkosturinn Þýða birtist aðeins á öðru tungumáli en sjálfgefnu tungumáli vefsins. Gulur bakgrunnur merkir texta sem er óþýddur.
3. Vöruheitum og vörulýsingum geturðu líka breytt á vörunni í Odoo með tungumálahnappnum, eins og lýst er í kaflanum Vöruheiti eða skilmálar birtast á ensku á skjölum.
4. Ef þú getur ekki valið textann og breytt honum eftir að þú smellir á Breyta, kemur hann úr Odoo eða þema vefsins.

[Skjámynd: vefsíða í Odoo með fellilistanum Breyta opnum og valkostinum Þýða merktum]

Hvenær á að hafa samband við Exigo

Hafðu samband ef enski textinn breytist ekki í Breyta eða Þýða. Sendu póst á hjalp@exigo.is með eftirfarandi:

• slóð síðunnar,
• skjámynd þar sem textinn er merktur,
• hvernig textinn á að vera á íslensku.