Verð, vörur og leiðarkerfi í vefverslun

Þessi síða hjálpar þér þegar verð í vefversluninni eða á sölupöntunum eru önnur en þú býst við, þegar vörur sjást ekki eða seljast þegar þær eiga ekki að gera það, og þegar vöruflokkar, síur eða röðun vara virka ekki eins og til er ætlast. Fyrir hvert tilvik sérðu hvað gæti valdið því, hvað þú getur athugað og hvenær þú hefur samband við Exigo.

Kortagreiðslur og afhendingarmátar í vefversluninni eru á eigin síðum. Tenglar á þær eru neðst á þessari síðu.

Viðskiptavinur sér rangt verð eða verðið 0

Innskráður viðskiptavinur sér almenna verðið en ekki verðið sem hann á að fá, gestir sjá annað verð en þeim er ætlað, eða vara sýnir 0 kr. í versluninni.

Hvað gæti valdið þessu

• Verðlisti viðskiptavinarins gildir ekki á vefsíðunni. Verðlisti gildir á vefsíðu aðeins ef reiturinn Vefsíða á honum vísar á hana, eða ef reiturinn er tómur og hakað er við Veljanlegt. Annars fær viðskiptavinurinn annan verðlista sem gildir á vefsíðunni.
• Gestir sem eru ekki innskráðir fá verðlistann sem er skráður á tengiliðinn Public user, ef hann gildir á vefsíðunni. Annars fá þeir efsta verðlistann í listanum yfir verðlista sem gilda á vefsíðunni, nema verðlisti sé tengdur landi þeirra í reitnum Landsflokkar.
• Hakað er við Veljanlegt á fleiri en einum verðlista. Þá birtist val um verðlista í versluninni og hver sem er getur valið verðlista með öðru verði en honum er ætlað.
• Vefsíðu var bætt við. Verðlisti tilheyrir aðeins einni vefsíðu, og nýr verðlisti tengist sjálfkrafa fyrstu vefsíðu fyrirtækisins. Verðlistarnir sem fyrir eru gilda því ekki á nýju vefsíðunni.
• Söluverð vörunnar er 0, eða verðregla gefur 0. Þá sýnir verslunin 0 kr. og hægt er að panta vöruna á því verði, nema kveikt sé á Koma í veg fyrir sölu á núllverðsvöru.

Hvað þú getur athugað

1. Opnaðu viðskiptavininn í Vefsíða ‣ Vefverslun ‣ Pantanir ‣ Viðskiptavinir og skoðaðu reitinn Verðlisti á flipanum Sala og innkaup.
2. Opnaðu þann verðlista í Vefsíða ‣ Vefverslun ‣ Vörur ‣ Verðlistar og farðu á flipann Vefverslun. Reiturinn Vefsíða á að vísa á vefsíðuna þína. Verðlisti án vefsíðu gildir aðeins ef hakað er við Veljanlegt, og þá geta allir valið hann. Ef verðlisti á að gilda á fleiri en einni vefsíðu skaltu afrita hann og velja hina vefsíðuna í reitnum Vefsíða á afritinu.
3. Hafðu aðeins hak í Veljanlegt á verðlistum sem allir mega velja sjálfir.
4. Til að sjá verðlista gesta skaltu opna Vefsíða ‣ Vefverslun ‣ Pantanir ‣ Viðskiptavinir, bæta við síunni Geymt og opna tengiliðinn Public user. Verðlistinn á flipanum Sala og innkaup er sá sem gestir fá, ef hann gildir á vefsíðunni.
5. Í listanum yfir verðlista ræður röðin því hvaða verðlisti er efstur. Dragðu verðlistann sem gestir eiga að fá efst í listann. Röðin ræður líka hvaða verðlista viðskiptavinir án eigin verðlista fá, líka á nýjum tilboðum í Sölu, svo athugaðu áhrifin áður en þú breytir henni.
6. Til að sjá hvaða verð verðlisti viðskiptavinarins gefur skaltu búa til tilboð á hann í Sölu og bæta vörunni við. Ef verðið er líka rangt þar, lestu kaflann Verð á tilboði eða sölupöntun er rangt eða 0 hér fyrir neðan.
7. Ef vara sýnir 0 kr., settu Söluverð á hana. Til að koma í veg fyrir sölu á 0 kr. skaltu kveikja á Koma í veg fyrir sölu á núllverðsvöru í Vefsíða ‣ Stillingar ‣ Stillingar, í hlutanum Vefverslun. Þá sýnir verslunin hnappinn Hafðu samband í stað verðsins og Bæta í körfu á vörum sem kosta 0 kr.
8. Opnaðu verslunina í nýjum huliðsglugga og athugaðu verðið aftur.

[Skjámynd: flipinn Ecommerce á verðlista með reitunum Vefsíða og Veljanlegt]

Hvenær á að hafa samband við Exigo

Hafðu samband ef verðlistinn og vefsíðan eru rétt stillt en viðskiptavinurinn sér samt rangt verð, eða ef þú vilt sýna verð aðeins innskráðum viðskiptavinum. Sendu með:

• heiti eða vörunúmer vörunnar og veffang vörusíðunnar,
• verðið sem birtist og verðið sem á að birtast,
• hvort viðskiptavinurinn var innskráður og, ef svo er, nafn hans,
• skjámynd af vörusíðunni.

Verð á tilboði eða sölupöntun er rangt eða 0

Þegar þú bætir vöru við tilboð eða sölupöntun fær línan rangt einingarverð, verðið 0 eða afslátt sem þú áttir ekki von á. Vefverslunin reiknar verð með sömu verðlistum, svo villa hér sést líka þar.

Hvað gæti valdið þessu

• Verðregla er af tegundinni Fast verð en ekkert verð var slegið inn. Ný verðregla er sjálfgefið Fast verð, svo regla sem er vistuð án verðs gefur 0 kr.
• Önnur regla gengur fyrir. Odoo notar aðeins eina reglu úr verðlistanum fyrir hverja vöru: fyrst reglu fyrir afbrigðið eða vöruna sjálfa, svo fyrir vöruflokk hennar og síðast fyrir allar vörur. Reglur í sama verðlista leggjast ekki saman.
• Reglan gildir ekki fyrir þetta magn eða þennan dag: magnið er undir lágmarksmagni reglunnar, eða dagsetning pöntunarinnar er utan gildistíma hennar.
• Reglan byggir á öðrum verðlista, og verðið fer þá líka eftir reglum hans.
• Neikvæð tala í afslætti hækkar verðið: afsláttur upp á -10 er 10% álagning.
• Verðlistanum á pöntuninni var breytt. Nýr verðlisti gildir aðeins um línur sem bætt er við eftir breytinguna.

Hvað þú getur athugað

1. Athugaðu reitinn Verðlisti á tilboðinu. Hann kemur frá viðskiptavininum þegar tilboðið er búið til.
2. Ef þú breyttir verðlistanum, smelltu á Uppfæra verð við hliðina á reitnum til að reikna allar línur upp á nýtt. Hnappurinn birtist ekki á staðfestum pöntunum.
3. Opnaðu verðlistann í Sala ‣ Vörur ‣ Verðlistar. Á flipanum Sales Prices skaltu finna reglurnar fyrir vöruna, vöruflokk hennar og allar vörur, og athuga dálkana Lágmarksmagn, Upphafsdagur og Lokadagur.
4. Opnaðu regluna sem á við. Ef Price Type er Fast verð, athugaðu hvort verð hafi verið slegið inn. Ef hún er Afsláttur eða Formúla, athugaðu prósentuna og á hvaða verði hún byggir.
5. Opnaðu vöruna og athugaðu Söluverð, því reglur sem byggja á söluverði reikna út frá því.

[Skjámynd: verðregla með Price Type, afslætti og Validity Period]

Hvenær á að hafa samband við Exigo

Hafðu samband ef verðið er rangt þótt reglurnar líti rétt út, eða ef breyta þarf mörgum verðlistalínum í einu, til dæmis eftir nýrri verðskrá frá birgi. Sendu með:

• númer tilboðsins eða pöntunarinnar,
• heiti vörunnar og verðlistans,
• verðið sem kom og verðið sem átti að koma,
• skrána með nýju verðunum, ef breyta á mörgum línum.

Vara sést ekki í vefversluninni eða er ekki hægt að kaupa hana

Vara sem á að vera til sölu finnst ekki í versluninni, eða vörusíðan sýnir aðeins heiti vörunnar en engan hnapp til að setja hana í körfu.

Hvað gæti valdið þessu

• Varan er ekki birt.
• Ekki er hakað við Sala efst á vöruforminu. Aðeins vörur sem má selja sjást í versluninni.
• Varan er í geymslu, eða öll afbrigði hennar eru í geymslu.
• Varan er bundin við aðra vefsíðu í reitnum Vefsíða, ef þú ert með fleiri en eina vefsíðu.
• Varan kostar 0 kr. og kveikt er á Koma í veg fyrir sölu á núllverðsvöru. Þá sýnir vörusíðan Hafðu samband í stað Bæta í körfu.
• Verslunin er aðeins opin innskráðum notendum. Þá fá gestir innskráningarsíðu þegar þeir opna verslunina.

Hvað þú getur athugað

1. Leitaðu að vörunni í versluninni í nýjum huliðsglugga. Starfsfólk sér líka óbirtar vörur, svo það að þú sjáir vöruna í venjulegum glugga þýðir ekki að viðskiptavinir sjái hana.
2. Opnaðu Vefsíða ‣ Vefverslun ‣ Vörur ‣ Vörur. Listinn sýnir sjálfgefið aðeins birtar vörur: fjarlægðu síuna Birt úr leitinni til að sjá allar, og bættu við síunni Geymt ef varan finnst samt ekki.
3. Opnaðu vöruna og athugaðu hvort hakað sé við Sala efst á forminu.
4. Á flipanum Sala, í hlutanum Ecommerce Shop, skaltu kveikja á Is Published, velja vöruflokka í reitnum Flokkar og hafa reitinn Vefsíða tóman eða með réttri vefsíðu.
5. Ef vörusíðan sýnir aðeins heitið, smelltu á snjallhnappinn Afbrigði og athugaðu hvort minnst eitt afbrigði sé virkt.
6. Ef gestir fá innskráningarsíðu, athugaðu Ecommerce Access í Vefsíða ‣ Stillingar ‣ Stillingar, í hlutanum Vefverslun. Með Allir notendur er verslunin opin öllum.

[Skjámynd: flipinn Sala á vöru með hlutanum Ecommerce Shop]

Hvenær á að hafa samband við Exigo

Hafðu samband ef varan er rétt stillt en sést samt ekki í huliðsglugga, eða ef þú vilt að vörur birtist eða hverfi sjálfkrafa eftir reglu, til dæmis eftir lagerstöðu, þyngd eða því hvort birgir á þær. Sendu með:

• heiti eða vörunúmer vörunnar,
• veffang vörusíðunnar eða verslunarsíðunnar þar sem hún á að sjást,
• skjámynd af því sem sést í huliðsglugga.

Vöruflokkar eða síur birtast ekki rétt

Vöruflokk vantar í verslunina, tómur flokkur sést, flokkur birtist á rangri vefsíðu, vara lendir í röngum flokki, eða sía, til dæmis fyrir lit eða vörumerki, birtist ekki.

Hvað gæti valdið þessu

• Tómir flokkar eru faldir fyrir gestum og viðskiptavinum, en innskráð starfsfólk sér þá. Flokkur telst tómur ef hvorki hann né undirflokkar hans hafa birta vöru.
• Varan er ekki tengd flokknum, eða tengd röngum flokki, í reitnum Flokkar á vörunni, til dæmis eftir innlestur vara.
• Flokkurinn er bundinn við aðra vefsíðu í reitnum Vefsíða á flokknum. Ef reiturinn er tómur sést flokkurinn á öllum vefsíðum.
• Flokkalistinn er falinn á verslunarsíðunni.
• Sía birtist aðeins fyrir eiginleika sem hafa eCommerce Filter stillt á Sjáanlegt og eru á minnst einni vöru í listanum sem er opinn. Síurnar geta líka verið faldar á verslunarsíðunni.

Hvað þú getur athugað

1. Opnaðu verslunina í nýjum huliðsglugga og athugaðu hvort flokkurinn eða sían sést þar.
2. Opnaðu flokkinn í Vefsíða ‣ Vefverslun ‣ Vörur ‣ Vefflokkar og athugaðu reitinn Vefsíða, ef þú ert með fleiri en eina vefsíðu.
3. Opnaðu vörurnar sem eiga að vera í flokknum og athugaðu hvort þær séu birtar og hvort flokkurinn sé í reitnum Flokkar á flipanum Sala.
4. Fyrir síur: opnaðu eiginleikann í Vefsíða ‣ Vefverslun ‣ Vörur ‣ Eiginleikar og stilltu eCommerce Filter á Sjáanlegt.
5. Opnaðu verslunarsíðuna, smelltu á Breyta, smelltu á vörulistann og farðu á flipann Snið. Í línunni Flokkar skaltu velja hvort flokkarnir birtast í Hliðarstika eða Efst, og í línunni Síur hvort og hvar síurnar sjást. Smelltu svo á Vista.

[Skjámynd: flipinn Snið á verslunarsíðunni með línunum Flokkar, Síur og Sjálfgefin röðun]

Hvenær á að hafa samband við Exigo

Hafðu samband ef flokkar birtast tvisvar eða oftar, eða ef flokkur með birtum vörum sést ekki í huliðsglugga. Sendu með:

• heiti flokksins,
• veffang síðunnar þar sem þetta sést,
• skjámynd og hvort hún var tekin í huliðsglugga.

Röðun eftir verði er röng

Þegar raðað er eftir verði í versluninni koma vörur í rangri röð, til dæmis vörur á 0 kr. eða ódýrar vörur innan um dýrari.

Hvað gæti valdið þessu

• Röðun eftir verði, Lægsta verði og Hæsta verði, fer eftir reitnum Söluverð á vörunni sjálfri, ekki eftir verðinu sem verðlisti reiknar og viðskiptavinurinn sér. Ef verðin í versluninni koma úr verðlista sem byggir ekki á söluverði, til dæmis föstu verði eða formúlu út frá kostnaði, en söluverð vörunnar er 0 eða gamalt, verður röðunin röng.
• Röðunin Mælt með fer eftir handvirkri röð vara, ekki eftir sölu eða vinsældum.

Hvað þú getur athugað

1. Opnaðu nokkrar vörur sem raðast rangt og berðu Söluverð þeirra saman við verðið í versluninni.
2. Breyttu söluverðinu aðeins ef verðið í versluninni kemur ekki út frá því, til dæmis ef verðreglan er með föstu verði eða byggir á kostnaði. Ef verðreglan byggir á söluverðinu breytist verðið sem viðskiptavinir greiða þegar þú breytir því. Hafðu þá samband við Exigo.
3. Til að velja sjálfgefna röðun skaltu opna verslunarsíðuna, smella á Breyta, smella á vörulistann og velja röðun í Sjálfgefin röðun á flipanum Snið.
4. Til að breyta röðinni Mælt með skaltu smella á vöru í breytiham og nota örvarnar í línunni Endurraða. Línan sést aðeins þegar sjálfgefna röðunin er Mælt með. Þú getur líka dregið vörur til í listayfirlitinu í Vefsíða ‣ Vefverslun ‣ Vörur ‣ Vörur.

Hvenær á að hafa samband við Exigo

Hafðu samband ef verðin í versluninni koma úr verðlista og söluverð vörunnar á að fylgja þeim sjálfkrafa. Sendu með:

• veffang verslunarsíðunnar með röðuninni,
• heiti tveggja eða þriggja vara sem raðast rangt,
• heiti verðlistans sem verðin koma úr.

Uppseld vara sést enn eða er seld áfram

Vara sem er uppseld sést enn í versluninni, viðskiptavinir geta pantað hana þótt hún sé ekki til, eða þú vilt merkja vörur eftir lagerstöðu.

Hvað gæti valdið þessu

• Odoo felur ekki uppseldar vörur í versluninni. Þær sjást áfram þar til þær eru teknar úr birtingu.
• Hakað er við Leyfa sölu óháð lagerstöðu á vörunni. Þá er hægt að panta hana þótt ekkert sé til.
• Ekki er hakað við Track Inventory á vörunni. Stillingarnar fyrir uppseldar vörur birtast aðeins á vörum þar sem hakað er við það.

Hvað þú getur athugað

1. Opnaðu vöruna og athugaðu hvort hakað sé við Track Inventory á flipanum Almennar upplýsingar.
2. Á flipanum Sala, í hlutanum Ecommerce Shop, skaltu taka hakið úr Leyfa sölu óháð lagerstöðu til að stöðva pantanir þegar varan er uppseld. Í Uppselt skilaboð geturðu skrifað texta sem viðskiptavinir sjá, til dæmis hvenær varan kemur aftur.
3. Sjálfgefið gildi fyrir nýjar vörur stillirðu í Vefsíða ‣ Stillingar ‣ Stillingar, í hlutanum Vefverslun, við Uppselt: Halda áfram sölu. Sú stilling breytir ekki vörum sem eru þegar til.
4. Til að merkja uppseldar vörur sjálfkrafa skaltu búa til borða í Vefsíða ‣ Vefverslun ‣ Vörur ‣ Product Ribbons og velja when out of stock í Úthluta.
5. Til að taka vöru alveg úr versluninni skaltu slökkva á Is Published. Til að taka eitt afbrigði úr sölu skaltu setja það í geymslu.

Hvenær á að hafa samband við Exigo

Hafðu samband ef þú vilt að uppseldar vörur hverfi sjálfkrafa úr versluninni, eða að borði birtist á vörum sem eru til á lager. Það þarf sérstaka uppsetningu. Sendu með:

• hvaða vörur eða vöruflokka þetta á við,
• hvað á að gerast þegar vara klárast og þegar hún kemur aftur á lager.

Afsláttur sést á vörusíðunni en ekki í körfunni, eða öfugt

Á vörusíðunni sést upprunalega verðið yfirstrikað, en í körfunni, á tilboðinu eða á reikningnum sést aðeins lægra verðið. Eða öfugt: afsláttur sést ekki fyrr en varan er komin í körfuna.

Hvað gæti valdið þessu

• Vörusíðan og karfan sýna afslátt eftir ólíkum reglum. Á verslunar- og vörusíðum er upprunalega verðið yfirstrikað bæði fyrir verðreglur af tegundinni Afsláttur og fyrir Formúla með afslætti. Í körfunni, á tilboðum og á reikningum sést afslátturinn aðeins ef reglan er af tegundinni Afsláttur og kveikt er á stillingunni Afslættir í stillingum Sölu. Annars sést aðeins lægra verðið. Viðskiptavinurinn greiðir sama verð í báðum tilvikum.
• Samanburðarverð, Bera saman við verð á vörunni, sést aðeins á verslunar- og vörusíðum, ekki í körfunni.
• Afslættir úr afsláttar- og vildarkerfum, til dæmis kynningar og afsláttarkóðar, reiknast í körfunni. Þeir sjást ekki á vörusíðunni.
• Magnafsláttur gildir aðeins þegar magnið nær lágmarksmagni reglunnar.

Hvað þú getur athugað

1. Opnaðu verðregluna, eins og lýst er í kaflanum Verð á tilboði eða sölupöntun er rangt eða 0 hér að ofan, og athugaðu Price Type. Til að afslátturinn sjáist líka í körfunni, á tilboðum og á reikningum skaltu nota tegundina Afsláttur í stað Formúla.
2. Kveiktu á stillingunni Afslættir í Sala ‣ Stillingar ‣ Stillingar og vistaðu.
3. Ef afsláttur á að sjást á vörusíðunni áður en varan fer í körfu skaltu setja hann í verðlista sem verðreglu af tegundinni Afsláttur, ekki í afsláttarkerfi.
4. Til að draga fram vörur á afslætti geturðu búið til borða í Vefsíða ‣ Vefverslun ‣ Vörur ‣ Product Ribbons með Úthluta stillt á On Sale. Hann birtist sjálfkrafa á vörum sem sýna afslátt.
5. Prófaðu í nýjum huliðsglugga, með sama magni og viðskiptavinurinn.

Hvenær á að hafa samband við Exigo

Hafðu samband ef verðið sem viðskiptavinurinn greiðir í körfunni er annað en á vörusíðunni, ekki aðeins framsetningin. Sendu með:

• veffang vörusíðunnar og magnið,
• skjámyndir af vörusíðunni og körfunni,
• hvort viðskiptavinurinn var innskráður og hvaða afsláttarkóða hann notaði, ef einhvern.

Verð birtast án VSK í vefversluninni

Verð í versluninni eru án virðisaukaskatts þótt þau eigi að vera með honum, eða sum verð eru með VSK og önnur án.

Hvað gæti valdið þessu

• Stillingin Sýna vöruverð er á Án VSK. Hún er stillt sérstaklega fyrir hverja vefsíðu, og ný vefsíða byrjar á Án VSK.
• Vöruna vantar söluskatt, eða rangur skattur er á henni, í reitnum Skattar viðskiptavinar. Verslunin reiknar VSK út frá sköttum vörunnar.

Hvað þú getur athugað

1. Opnaðu Vefsíða ‣ Stillingar ‣ Stillingar. Ef þú ert með fleiri en eina vefsíðu, veldu fyrst rétta vefsíðu efst á síðunni.
2. Í hlutanum Vefverslun skaltu velja Með VSK við Sýna vöruverð og vista.
3. Opnaðu vörur sem sýna rangt verð og athugaðu reitinn Skattar viðskiptavinar á flipanum Almennar upplýsingar.
4. Opnaðu verslunina í nýjum huliðsglugga og athugaðu verðin aftur.

Hvenær á að hafa samband við Exigo

Hafðu samband ef verðin eru enn röng eftir þetta, eða ef þú selur bæði fyrirtækjum á verði án VSK og einstaklingum á verði með VSK. Sendu með:

• veffang vörusíðunnar,
• verðið sem birtist og verðið sem á að birtast,
• hvort viðskiptavinurinn var innskráður.