Bankatenging og kröfur — IOBS

Exigo IOBS tengir Odoo við íslenska bankann þinn. Kerfið sækir bankafærslur inn í bankayfirlit í Odoo og stofnar kröfur út frá reikningum til viðskiptavina, sem birtast svo í netbanka greiðandans.

Þegar krafa er greidd sækir Odoo greiðsluna, bókar hana með gjöldunum á viðeigandi bókhaldslykla og jafnar hana á móti reikningnum. Odoo tengist bankanum ekki beint heldur í gegnum bankaþjónustu Exigo.

Áður en þú byrjar

IOBS hefur tvo hluta: bankayfirlit og kröfur. Þú getur notað annan hvorn hlutann eða báða. Viðbótin byggir á Reikningagerð eða Fjárhag í Odoo.

Frá bankanum

Þetta þarf að liggja fyrir hjá bankanum:

• Fyrirtækið hefur netbankanotanda með virkum B2B-aðgangi (vefþjónustuaðgangi).
• Bankinn tengir þennan notanda við búnaðarskilríki Exigo, einu sinni fyrir hvert fyrirtæki. Ef bókhaldsstofa sér um bókhaldið er notandi stofunnar tengdur í staðinn.
• Notandinn er opinn (virkur) hjá bankanum.
• Þú hefur notandanafn og lykilorð notandans við höndina, því þau eru skráð í Odoo.
• Þú veist númer bankareikninganna sem á að tengja.

Fyrir kröfur: kröfusamningur

Til að senda kröfur þarf fyrirtækið kröfusamning við bankann. Exigo þarf eftirfarandi upplýsingar úr honum:

• Auðkenni: allt að 3 stafir.
• Kröfureikningur: reikningurinn sem greiðslur krafna berast inn á, á forminu NNNN-NN-NNNNNN.
• Bankanúmer: allt að 4 stafir. Það er fyrsti hluti lykils hverrar kröfu hjá bankanum.
• Höfuðbók: sjálfgefið 66.
• Gjöld: tilkynningar- og greiðslugjald, fyrra og seinna vanskilagjald og fjöldi daga frá gjalddaga að hvoru vanskilagjaldi.
• Síðasta kröfunúmer sem fyrirtækið hefur þegar notað hjá bankanum, svo að kröfunúmer úr Odoo haldi áfram fyrir ofan það.
• Bókhaldslyklar fyrir hverja gjaldalínu kröfugreiðslna.

Hver gerir hvað

Uppsetning

Hér eru skrefin í þeirri röð sem þau eru unnin.

Tenging við bankaþjónustu Exigo

Exigo sér um þetta skref. Exigo opnar fyrir Odoo-þjóninn þinn hjá bankaþjónustu Exigo og setur upp tenginguna í Stillingar ‣ Stillingar netbanka, í hlutanum Uppsetning netbanka. Þú þarft ekki að gera neitt hér.

Netbankanotandi hjá bankanum

Þú og Exigo sjáið um þetta skref saman:

1. Þú biður bankann að virkja B2B-aðgang fyrir netbankanotanda fyrirtækisins.
2. Þú sendir Exigo notandanafn netbankanotandans og nafn tengiliðs hjá fyrirtækinu.
3. Exigo sendir bankanum beiðni um að tengja notandann við búnaðarskilríki Exigo, með tengiliðinn í afriti.
4. Ef bankinn biður tengiliðinn að staðfesta beiðnina svarar tengiliðurinn bankanum.

Innskráning bankans í Odoo

Þú sérð um þetta skref, eða Exigo ef þú óskar þess. Aðeins notendur með stjórnandaréttindi í Stillingum sjá reitina.

1. Farðu í Tengiliðir ‣ Stillingar ‣ Bankareikningar ‣ Bankar og opnaðu bankann þinn.
2. Í hlutanum Innskráningarupplýsingar banka (B2B) skaltu fylla út IOBS notandanafn og IOBS lykilorð.

[Skjámynd: banki með hlutanum Innskráningarupplýsingar banka (B2B), lykilorð falið]

Tenging bankadagbókar

Gerðu þetta fyrir hverja bankadagbók sem á að fá færslur frá bankanum:

1. Farðu í Fjárhagur ‣ Stillingar ‣ Fjárhagur ‣ Dagbækur og opnaðu bankadagbókina.
2. Opnaðu flipann Fylgiskjöl.
3. Veldu bankareikninginn sem á að sækja færslur fyrir í reitnum Númer bankareiknings.
4. Veldu Exigo bankaþjónusta í Bankastreymi.
5. Veldu Sjálfvirkt í reitnum IOBS straumhamur bankayfirlits. Þá eru færslur sóttar á klukkustundar fresti.

[Skjámynd: flipinn Fylgiskjöl á bankadagbók með Exigo bankaþjónustu og Sjálfvirkt valið]

Prófun á sókn bankayfirlita

1. Á stjórnborði Fjárhags skaltu smella á Sækja bankayfirlit (IOBS) á spjaldi bankadagbókarinnar.
2. Glugginn Sækja bankayfirlit opnast. Athugaðu reitina Bankareikningur, Frá og Til.
3. Smelltu á hnappinn Sækja bankayfirlit.

Frá er sjálfgefið dagsetning nýjustu færslulínunnar sem þegar er í dagbókinni. Ef dagbókin er tóm er hún 100 ár aftur í tímann, svo veldu þá dagsetninguna sem sóknin á að byrja á.

Ef ekkert nýtt er að sækja birtist „Engar nýjar færslur fundust“.

Kröfustillingar

Exigo sér um þetta skref, með upplýsingum úr kröfusamningnum þínum. Stillingarnar eru í Stillingar ‣ Stillingar netbanka, í hlutanum Uppsetning netbanka, og krefjast stjórnandaréttinda í Stillingum.

Kröfureikningurinn er merktur á bankareikningi fyrirtækisins sjálfs: hakað er í Nota fyrir kröfur og Auðkenni fyllt út undir Innheimtukröfur. Hvert fyrirtæki hefur einn kröfureikning og fyrirtækið sjálft er eigandi hans.

Í hlutanum Greiðslugjöld / Bókhaldslyklar er bókhaldslykill fyrir hvern hluta greiðslu. Hver greiðsla kröfu er bókuð sem ein færsla með þessum línum. Sjálfgefni lykillinn er settur ef hann er til í bókhaldslyklunum þínum.

[Skjámynd: Stillingar netbanka með hlutunum Vanskilagjald og Greiðslugjöld / Bókhaldslyklar]

Kröfuferli viðskiptavina

Þú sérð um þetta skref. Stilltu fyrir hvern viðskiptavin hvort og hvernig hann fær kröfur:

1. Farðu í Tengiliðir og opnaðu viðskiptavininn (fyrirtækistengiliðinn).
2. Opnaðu flipann Fjárhagur.
3. Í hlutanum Innheimtukröfur skaltu velja Innheimtukröfuferli: Einn reikningur á hverja kröfu eða Margir reikningar á hverja kröfu.
4. Ef viðskiptavinurinn á aldrei að fá kröfu skaltu haka í Ekki stofna innheimtukröfur. Þá hverfur Innheimtukröfuferli.

Nýr tengiliður fær sjálfgefið kröfuferli fyrirtækisins þegar hann er stofnaður. Það er Einn reikningur á hverja kröfu nema Exigo hafi breytt því.

Kennitala viðskiptavinarins þarf að vera skráð á fyrirtækistengilið hans til að reikningar hans geti fengið kröfu.

Aðgangur notenda

Stjórnandi hjá þér veitir notendum aðgang:

• Valmyndin Fjárhagur ‣ Innheimtukröfur krefst aðgangsins Reikningagerð eða hærri í Fjárhag.
• Sækja kröfugreiðslur og Stofna kröfur tímabils eru aðeins sýnileg notendum með Show Full Accounting Features.

Dagleg notkun

Valmyndin Innheimtukröfur

Allt sem snýr að kröfum er undir Fjárhagur ‣ Innheimtukröfur:

Hvaða reikningar geta fengið kröfu

Reikningur getur fengið kröfu þegar:

• hann er reikningur til viðskiptavinar, ekki kreditreikningur, og hefur ekki verið ógiltur;
• gjaldmiðill hans er ISK;
• á honum er ógreidd fjárhæð og hann er ógreiddur eða greiddur að hluta;
• hann hefur enga virka kröfu, það er kröfu sem hefur ekki verið felld niður;
• kennitala viðskiptavinarins er skráð á fyrirtækistengilið hans;
• ekki er hakað í Ekki stofna innheimtukröfur á viðskiptavininum;
• hann hefur gjalddaga.

Drög geta líka fengið kröfu. Þau eru þá bókuð um leið og krafan er stofnuð.

Krafa fyrir einn reikning

Fyrir viðskiptavini á Einn reikningur á hverja kröfu stofnarðu kröfuna á reikningnum sjálfum:

• Á drögum: smelltu á Staðfesta reikning og senda í banka. Reikningurinn er bókaður og krafan stofnuð.
• Á bókuðum reikningi: smelltu á Senda kröfur í bankann.

Hnapparnir sjást aðeins þegar reikningurinn getur fengið kröfu og viðskiptavinurinn er á Einn reikningur á hverja kröfu.

Kröfunúmerið kemur úr kröfunúmeraseríu fyrirtækisins. Tilvísun kröfunnar er tölustafirnir í reikningsnúmerinu og fjárhæðin er ógreidd fjárhæð reikningsins.

Ein krafa fyrir marga reikninga

Fyrir viðskiptavini á Margir reikningar á hverja kröfu notarðu Stofna kröfur tímabils:

1. Farðu í Fjárhagur ‣ Innheimtukröfur ‣ Stofna kröfur tímabils.
2. Veldu Frá og Til. Reikningar eru valdir eftir reikningsdagsetningu og sjálfgefið er síðasti almanaksmánuður.
3. Til að setja alla reikninga hvers viðskiptavinar í eina kröfu skaltu haka í Setja gjalddaga krafna og velja Gjalddagi krafna. Gjalddaginn má ekki vera liðinn.
4. Smelltu á Stofna kröfur.

Kröfur eru stofnaðar fyrir þá reikninga fyrirtækisins á tímabilinu sem geta fengið kröfu, hjá viðskiptavinum á Margir reikningar á hverja kröfu. Ein krafa er stofnuð fyrir hvern viðskiptavin og hvern gjalddaga, svo reikningar með ólíka gjalddaga fá hver sína kröfu nema þú setjir gjalddaga krafna. Reikningar til undirtengiliða fara í kröfu móðurfyrirtækisins.

[Skjámynd: glugginn Stofna kröfur tímabils með Setja gjalddaga krafna hakað]

Sending krafna

Krafa er ekki send um leið og hún er stofnuð. Hnappurinn á reikningnum setur kröfuna í stöðuna Í bið. Daglega keyrslan Senda kröfur í bið sendir hana, eða þú sendir hana strax með Fjárhagur ‣ Innheimtukröfur ‣ Senda kröfur í bankann.

Áður en krafa er send er athugað hvort bankinn hafi þegar kröfu með sama kröfunúmeri. Ef svo er fær krafan stöðuna Krafa er til.

Staða kröfu

Kröfuspjaldið

Þegar þú opnar kröfu sérðu kröfuspjaldið, Innheimtukrafa. Á því eru tveir hnappar:

• Hætta við fellir kröfuna niður eftir staðfestingu. Hnappurinn sést í stöðunum Drög, Í bið, Send, Krafa ekki felld niður og Villa við sendingu.
• Uppfæra stöðu kröfu frá banka sækir stöðu og fjárhæðir kröfunnar til bankans. Hnappurinn sést ekki á kröfu í stöðunni Krafa er til.

Flipinn Reikningar sýnir reikningana í kröfunni og flipinn Ítarupplýsingar kröfu sýnir fjárhæðir og gjöld eins og bankinn gaf þau síðast upp.

Krafa í stöðunni Drög, Í bið eða Villa við sendingu er aðeins felld niður í Odoo. Aðrar kröfur eru felldar niður hjá bankanum. Ef bankinn hafnar niðurfellingu fær krafan stöðuna Krafa ekki felld niður.

Til að uppfæra margar kröfur í einu skaltu velja þær í kröfulistanum og nota Uppfæra kröfuupplýsingar frá banka í aðgerðavalmynd listans.

[Skjámynd: kröfuspjald með hnöppunum Hætta við og Uppfæra stöðu kröfu frá banka]

Greiðslur krafna

Daglega keyrslan Sækja kröfugreiðslur frá banka sækir greiðslur krafna. Til að sækja þær strax:

1. Farðu í Fjárhagur ‣ Innheimtukröfur ‣ Sækja kröfugreiðslur.
2. Veldu Færsludagur frá og Færsludagur til.
3. Smelltu á Sækja kröfugreiðslur.

Hver greiðsla er pöruð við kröfu í Odoo eftir kröfunúmeri. Odoo merkir þá kröfuna Greidd, bókar færslu í dagbók kröfugreiðslna með einni línu fyrir hvern hluta greiðslunnar og jafnar hana á móti reikningum kröfunnar.

Bankayfirlit og kröfur

Þegar bankayfirlit er sótt er færslulína tengd kröfu ef seðilnúmer línunnar er kröfunúmerið og kennitala greiðandans er kennitala viðskiptavinarins.

Ef greiðsla kröfunnar hefur þegar verið sótt með sömu fjárhæð er línan tengd færslu greiðslunnar. Annars bíður færsla línunnar óbókuð þar til greiðslan berst.

Aðrar línur fá viðskiptavin ef nákvæmlega einn fyrirtækistengiliður hefur kennitölu greiðandans.

Í Odoo Enterprise opnast bankaafstemmingin með síunni Fela kröfutengt virkri. Hin sían er Sýna aðeins kröfutengt. Kröfutengdar línur tengjast greiðslu kröfunnar: ekki er hægt að afstemma þær handvirkt og sjálfvirka afstemmingin sleppir þeim.

Reikningar með virka kröfu

• Ekki er hægt að skrá greiðslu á reikning með virka kröfu. Fella þarf kröfuna niður fyrst, skrá greiðsluna og stofna síðan nýja kröfu fyrir eftirstöðvarnar.
• Reikningur getur ekki orðið fullgreiddur meðan hann hefur kröfu sem er hvorki Greidd né Niðurfelld.
• Þegar þú gerir kreditreikning fyrir reikninginn spyr Odoo fyrst: „Þetta fellir niður allar virkar, ógreiddar kröfur tengdar völdum reikningum. Viltu halda áfram?“ Síðan eru allar virkar kröfur á reikningnum felldar niður, hjá bankanum þar sem þess þarf.

Sjálfvirkar keyrslur

Fjórar keyrslur sjá um samskiptin við bankann fyrir öll fyrirtæki í gagnagrunninum. Hver gagnagrunnur hefur sínar eigin tímasetningar. Hafðu samband við Exigo ef þú vilt breyta þeim.

Sömu verk má vinna handvirkt:

• Fjárhagur ‣ Innheimtukröfur ‣ Senda kröfur í bankann sendir kröfur í bið.
• Uppfæra stöðu kröfu frá banka á kröfuspjaldinu, eða Uppfæra kröfuupplýsingar frá banka í kröfulistanum, uppfærir kröfur.
• Fjárhagur ‣ Innheimtukröfur ‣ Sækja kröfugreiðslur sækir greiðslur krafna.
• Sækja bankayfirlit (IOBS) á stjórnborði Fjárhags sækir bankafærslur.

Þegar eitthvað fer úrskeiðis

Byrjaðu á Fjárhagur ‣ Innheimtukröfur ‣ Innheimtukröfur með villum þegar eitthvað er að kröfum.

Ný bankatenging virkar ekki

Eftir uppsetningu berast engin bankayfirlit og kröfur fara ekki í gegn. Athugaðu:

• Hefur bankinn tengt netbankanotandann við búnaðarskilríki Exigo? Þetta er algengasta ástæðan.
• Er B2B-aðgangur notandans virkur? Lykilorð sem er ekki samþykkt getur þýtt að B2B-aðgangurinn sé ekki virkur.
• Er notandinn opinn hjá bankanum?
• Hefur lykilorðið verið skráð í Odoo? Sjá kaflann Innskráning bankans í Odoo hér að ofan.

Hafðu samband við bankann vegna B2B-aðgangsins og við Exigo vegna tengingar við búnaðarskilríkin.

Hafðu samband við Exigo ef sóknin sýnir „Villa 504: Gateway Timeout. Ekki tókst að tengjast netþjóni. Athugið hvítlistun IP-tölu.“ Sú villa þýðir að ekki hefur verið opnað fyrir Odoo-þjóninn þinn hjá bankaþjónustu Exigo. Hafðu líka samband við Exigo til að prófa sóknina þegar uppsetningu er lokið.

Hnapp til að stofna kröfu vantar á reikning

Á reikningnum er hvorki Senda kröfur í bankann né Staðfesta reikning og senda í banka. Athugaðu:

• Er viðskiptavinurinn á Margir reikningar á hverja kröfu? Þá eru engir hnappar á reikningnum. Notaðu Stofna kröfur tímabils.
• Er hakað í Ekki stofna innheimtukröfur á viðskiptavininum?
• Er kennitala skráð á fyrirtækistengilið viðskiptavinarins?
• Er reikningurinn í ISK, ógreiddur eða greiddur að hluta, og án virkrar kröfu?
• Er þetta kreditreikningur? Kreditreikningar fá ekki kröfu.

Ef Odoo segir „Reikningurinn þarf að hafa gjalddaga“ þarf reikningurinn gjalddaga áður en krafan er stofnuð.

Krafa er ekki send eða fær villustöðu

Krafan er rauð í listanum (Villa við sendingu, Villa í kröfu, Krafa er til eða Ógild), situr í stöðunni Í bið eða sést ekki í netbanka greiðandans. Hvað þú gerir fer eftir stöðunni:

• Í bið: krafan bíður eftir daglegu keyrslunni. Sendu hana strax með Fjárhagur ‣ Innheimtukröfur ‣ Senda kröfur í bankann.
• Villa í kröfu: opnaðu kröfuna og smelltu á Uppfæra stöðu kröfu frá banka.
• Krafa er til: bankinn hefur þegar kröfu með þessu kröfunúmeri. Það gerist til dæmis þegar kröfunúmerasería fyrirtækisins er lægri en síðasta kröfunúmer hjá bankanum. Hafðu samband við Exigo.

Krafa í stöðunni Villa við sendingu er ekki send aftur sjálfkrafa. Staðan þýðir ekki að bankinn hafi ekki kröfuna, því krafan gæti hafa verið stofnuð hjá bankanum þótt svarið hafi ekki borist. Farðu svona að:

1. Opnaðu kröfuna og smelltu á Uppfæra stöðu kröfu frá banka.
2. Ef krafan fær stöðuna Send hefur bankinn hana. Láttu hana þá vera.
3. Ef hún er áfram í stöðunni Villa við sendingu skaltu fella hana niður með Hætta við, sem er þá aðeins gert í Odoo, og stofna nýja kröfu á reikningnum. Einnig geturðu haft samband við Exigo. Nýja krafan fær nýtt kröfunúmer.

Aðrar ástæður:

• Fyrra eða seinna vanskilagjald, eða dagafjöldinn að þeim, er núll. Þá er krafan ekki send og Odoo sýnir villuna „Viðfang … er ekki stærra en 0.“
• Innskráning bankans er röng. Sjá kaflann Bankatengingin hættir að virka hér að neðan.
• Bankinn hafnar kröfunni vegna eigin reglna eða breytinga hjá sér.

Hafðu samband við Exigo vegna stöðunnar Krafa er til, vegna villna sem endurtaka sig og þegar breyta þarf vanskilagjöldum eða kröfunúmeraseríu. Venjulegir notendur geta ekki breytt þeim stillingum.

Krafa er greidd en reikningurinn er enn ógreiddur

Greiðandinn hefur greitt kröfuna í netbankanum, en reikningurinn er opinn í Odoo eða engin greiðslufærsla er til. Algengar ástæður:

• Tímasetning. Greiðslur krafna eru sóttar einu sinni á dag og bankinn skilar þeim stundum seint, til dæmis ekki fyrr en næsta morgun.
• Sjálfgefin dagbók bankareiknings fyrir kröfugreiðslur er röng eða ekki útfyllt.
• Kröfunni var breytt eða hún felld niður í netbankanum en ekki í Odoo.
• Rangur bókhaldslykill er á gjaldalínu í Greiðslugjöld / Bókhaldslyklar.
• Viðskiptavinurinn er tvískráður, eða tveir tengiliðir hafa sömu kennitölu. Greiðslan lendir þá á röngum tengilið eða bankafærslan fær engan viðskiptavin.
• Krafan var stofnuð utan Odoo eða henni var eytt í Odoo. Greiðslur á slíkum kröfum eru hunsaðar.
• Krafan fór til innheimtufyrirtækis.

Hvað þú getur gert:

• Bíddu í einn dag.
• Sæktu greiðslurnar handvirkt með Fjárhagur ‣ Innheimtukröfur ‣ Sækja kröfugreiðslur fyrir greiðsludagana. Til þess þarf Show Full Accounting Features.
• Biddu stjórnanda að athuga Sjálfgefin dagbók bankareiknings fyrir kröfugreiðslur.
• Sameinaðu tvískráða tengiliði.

Hafðu samband við Exigo ef greiðslan hefur ekki skilað sér eftir keyrslu næsta dags, eða ef krafan fór til innheimtufyrirtækis.

Bankatengingin hættir að virka

Kröfur fá villustöðu og engin ný bankayfirlit berast. Ástæður:

• Lykilorði netbankanotandans var breytt hjá bankanum en Odoo hefur enn það gamla.
• Bankarnir endurnýjuðu skilríki sín.
• Rangt lykilorð er skráð í gagnagrunni með mörg fyrirtæki. Ein innskráning gildir fyrir hvern banka í öllum gagnagrunninum.
• Bankinn breytti uppsetningu sinni og þörf er á nýrri útgáfu viðbótarinnar.

Ef lykilorðinu var breytt skaltu uppfæra IOBS lykilorð á bankanum, eins og lýst er í kaflanum Innskráning bankans í Odoo. Nýja lykilorðið gildir strax líka fyrir kröfur sem þegar eru til.

Hafðu síðan samband við Exigo til að staðfesta tenginguna og vegna krafna sem brugðust meðan tengingin lá niðri. Kröfur í stöðunni Villa við sendingu eru ekki sendar aftur sjálfkrafa. Smelltu á Uppfæra stöðu kröfu frá banka á hverri þeirra áður en þú fellir hana niður eða stofnar aftur, eins og lýst er í kaflanum Krafa er ekki send eða fær villustöðu.

Bankafærslur berast ekki sjálfkrafa

Ný bankayfirlit koma ekki inn nema þau séu sótt handvirkt. Ástæður:

• Dagbókin er á Handvirkt. Það er sjálfgefið og klukkutímakeyrslan sleppir slíkum dagbókum.
• Rangt reikningsnúmer er skráð á bankareikningi dagbókarinnar.
• Fleiri en ein dagbók notar sama bankareikning með valkostinum Exigo bankaþjónusta.

Hvað þú getur gert:

• Biddu stjórnanda að stilla reitinn IOBS straumhamur bankayfirlits á Sjálfvirkt.
• Sæktu færslurnar strax með Sækja bankayfirlit (IOBS) á spjaldi dagbókarinnar á stjórnborði Fjárhags. Sóknin byrjar á dagsetningu nýjustu línunnar sem er í dagbókinni.

Hafðu samband við Exigo ef sóknin sýnir villu.

Viðskiptavinur fær fleiri en einn greiðsluseðil

Viðskiptavinur fær tvær eða fleiri kröfur þegar búist var við einni. Ástæður:

• Kröfur eru flokkaðar eftir viðskiptavini og gjalddaga. Reikningar með ólíka gjalddaga, til dæmis vegna greiðsluskilmála sem miða við mánaðamót að viðbættum dögum, fá hver sína kröfu.
• Reikningar til undirtengiliða fara í kröfu móðurfyrirtækisins.

Athugaðu Innheimtukröfuferli á viðskiptavininum. Til að setja reikninga mánaðarins í eina kröfu skaltu nota Stofna kröfur tímabils með Setja gjalddaga krafna.

Ekki hægt að skrá greiðslu eða kreditreikning

Odoo stöðvar greiðslu, afskrift eða kreditreikning á reikningi með kröfu og segir „Ekki er heimilt að skrá greiðslu á reikning sem hefur verið settur í kröfuferli. Vinsamlegast felldu kröfuna niður fyrst, skráðu greiðsluna aftur og stofnaðu síðan nýja kröfu fyrir eftirstöðvarnar.“ eða „Ekki er heimilt að stofna kröfu vegna greiddra reikninga“.

Ástæðan er sú að reikning með virka kröfu er ekki hægt að greiða eða gera upp í Odoo. Hvað þú getur gert:

• Felldu kröfuna niður fyrst og skráðu svo greiðsluna eða afskriftina. Stofnaðu nýja kröfu fyrir eftirstöðvar ef einhverjar eru.
• Ef krafan var þegar felld niður í netbankanum skaltu smella á Uppfæra stöðu kröfu frá banka svo Odoo skrái hana Niðurfelld.
• Kreditreikningur fellir kröfuna niður sjálfkrafa, og alla sameinuðu kröfuna ef reikningurinn er í henni.

Ef Odoo segir „Ekki er hægt að bakfæra þessa reikninga:“ tókst ekki að fella kröfuna niður. Hafðu þá samband við Exigo.

Vanskilagjöld eða fjárhæð kröfu eru röng

• Krafa sem er stofnuð aftur fær upprunalegan gjalddaga reikningsins. Ef hann er liðinn reiknar bankinn vanskilagjöld strax.
• Fjárhæð kröfu er ógreidd fjárhæð reikningsins þegar krafan er stofnuð.
• Krafa geymir gjöldin sem giltu þegar hún var stofnuð. Breyting á stillingum hefur ekki áhrif á eldri kröfur.

Hafðu samband við Exigo vegna allra frávika í fjárhæðum.

Valmyndina Innheimtukröfur eða hluta hennar vantar

Notandann vantar aðganginn Reikningagerð í Fjárhag, eða Show Full Accounting Features fyrir Sækja kröfugreiðslur og Stofna kröfur tímabils. Stjórnandi bætir aðganginum við á notandanum.

Odoo 17

Í Odoo 17 eru sömu valmyndir, hnappar og stillingasíða og í Odoo 19, með þessum mun:

• Stillingahlutinn Online Bank Configuration er á ensku í íslensku viðmóti.
• Reiturinn Kröfunúmerasería er ekki á stillingasíðunni.
• Gjaldastillingar, það er vanskilagjöld og dagar, tilkynningar- og greiðslugjald, höfuðbók og dagbók kröfugreiðslna, gilda fyrir allan gagnagrunninn. Í Odoo 19 gilda þær fyrir hvert fyrirtæki.
• Ein kröfunúmerasería er sameiginleg öllum fyrirtækjum. Í Odoo 19 hefur hvert fyrirtæki sína.
• Bankanúmer er lesið úr stillingunum í hvert sinn, svo leiðrétting gildir líka fyrir kröfur sem þegar eru til. Í Odoo 19 er það geymt á hverri kröfu.
• Í Odoo 17 Enterprise birtast kröfutengdar línur í bankaafstemmingu með merkinu Has Claim og ekki er hægt að afstemma þær. Sían Fela kröfutengt er ekki til.
• Þegar reikningar eru gerðir sjálfkrafa við afhendingu með viðbót Exigo er krafa stofnuð og sett í bið um leið og reikningurinn er bókaður, ef hann getur fengið kröfu og viðskiptavinurinn er á Einn reikningur á hverja kröfu. Reikningar með undanskilda greiðsluskilmála fá ekki kröfu, og sjálfgefið er skilmálinn um greiðslu strax undanskilinn. Hafðu samband við Exigo til að breyta því hvaða skilmálar eru undanskildir. Þessi sjálfvirkni er ekki í Odoo 19.

Sumir íslenskir textar eru aðrir í Odoo 17:

Sjá einnig

• Bankareikningar og handbært fé
• Afstemming bankafærslna
• Dagbækur
• Kreditnótur og endurgreiðslur
• Greiðslur
• Sameina tengiliði
• Aðgangsheimildir
• Hafa samband við Exigo